Neujahrspredigt Radio Tell/Heimatklang, Mundart

1. Januar 2015 (Kommentare: 0)

Auch die grösste Reise beginnt mit einem Schritt

Grüessech u Gottwilche zur Nöijahrsbredig uf Radio „Tell“ u „Heimatklang“. Am Mikrofon isch dr Ruedi Heinzer, Pfarrer vor reformierte Bärnerchilche. Frutige isch mi letschti Gmein gsy u jetz bini scho chly pensioniert. Wohne tuen i z Spiez.

Ds nöje Jahr isch ersch grad gsäjt worde. Wie ne Sämlig ligts no im Härd u wartet uf ds Errünne. Was einisch drus wird, wes de afaht sprosse, das weiss ersch dr Herrgott. Es nöis Jahr faht munzig chlyn a. Alles faht eigentlech munzig chlyn a. O du, wo d mir jetz zuelosisch, bisch einisch sone chlyni Zälle gsy, dass diner Eltere noni mal hei gmerkt, dass du am Lande bisch. Da ligt e Wahrheit drin, es Naturgsetz vom Läbe. Mir wei das jetz chly usbeinle und de mitnä ufe läng Marsch i ds Zwöituusigufüffzäh!

 „Jesus erzählte ihnen ein Gleichnis und sagte: Mit dem Reich Gottes ist es wie mit einem Senfkorn, das jemand auf den Acker säte. Es ist das kleinste von allen Samenkörnern; sobald es aber aufgewachsen ist, ist es größer als die anderen Gewächse und wird zu einem Baum, sodass die Vögel des Himmels kommen und in seinen Zweigen nisten.“ So schteits im Matthäusevangelium, Kapitel 13.

Da müessemer afe zwo Sache verschta. „Reich Gottes“ u „Senfkorn“? Was meint er mit „Reich Gottes“? Är gseht e nöji Wält cho, e Wält, wo d Liebi schtercher isch als üse Egoismus, wo di Chlyne u Arme reschpäktiert wärde, wo ds Geischtige höcher im Kurs schteit als Gäld, türi Hütten u schnälli Chläpf. Es chunnt e Wält, seit Jesus, wo wieder eso funktioniert, wie Gott sen urschprünglech het täicht. Dere nöje Wält seit är „das Reich Gottes“. U de „Senfkorn“? Normalerwys tüet dihr öppe nid Sämf i Garte säje, emu nid settige Sämf, wo dr Jesus meint. Dä Sämf, wo im heilige Land wachst, het winzigi Sämlige, öppe so wie Rüeblisame. U wen er de gross isch, chaner drü bis vier Meter höch wärde. U wahrschinlech het dr Jesus da vomne riesige Boum gredt, wo no viel grösser wär als z Sämfchchruut, will ds Rych vo Gott einisch alli natürleche Vrglyche sprängt.

Das git is dr Jesus also mit i ds nöje Jahr: Die Wält muess besser wärde, u das faht munzig chlyn a. Die nöiji Wält vo Gott spriesst u wachst garantiert, u einisch isch si so riesegross, dass me sech nümm cha vorschtelle, wi chlyn si früecher het aagfange.

Das isch eigetlech nüt nöis, oder? Jedi Bärgtour faht mit mene chlyne Schritt a. Als Ching het mi das albe schrecklech tüecht: Usrücken uf e Wanderig, wo dr Vatter seit, si göng numen öppe vier Schtung. Vo wytem het me dä Horeb gseh, wo me ueche hätt sölle: Ah, nie, nie, nie schaffen is dert ueche! Miner Scheiche si schwär, i bi scho müed ufgstange un i ha jetz Hunger! Aber denn het me s müesse lehre, gället: Ei Schritt umen anger, chlyni Schritt, meh bruchts nid. Di gröschti Bärgtour isch nüt angers als chlyni Schritt, wo me zämehäicht. Alles Grosse besteit us unzählige chlyne Tate, u jedi chly Tat brucht e liechte Funken Aschträngig. U dä liecht Funken Aaschträngig, dä isch für teil scho schwär gnue. Das merksch vilech, we dr einisch dr Tag stinkt und du am liebschte wurdsch im Näscht blybe lige. Was muess me da nid alls Cheibs Chlyns mache, bis me äntli cha dr Schlüssel träjen u i d Wält use gwaggle! We me ne Depressive het, de stinkt eim jedes einzelne Schrittli, vom Pijama zämelege zum Zäng putze u d Frisur richte. Alls brucht Aaschträngig, Heimatland! U glych hets o ne heiteri Syte: Jitz grad muesch afe numen öppis Chlyses mache. Denn chaisch dr uf d Achsle chlopfen u säge: „Guet du, jetz hesch doch scho erfolgrych Zäng putzt! Jetz chönntsch ja o no d Häng abtröchne u de dr Strähl füresueche.“ Wüssst dr, dir junge Stürmi, es git viel Lüt, wo sech däwä dür dr Tag müesse kämpfe, wil si alt sy, oder chrank oder behinderet, oder will si eifach nid möge. Es tuet o de gsunde Macher ganz guet, mal dra z täiche, wie viel unzähligi chlyni Tapferkeite da zäme chöme, bis öppis äntleche fertig da steit.

Also, das isch die einti Wahrheit, wo mir us eme Glychnis vom Jesus lehre: Alles Grosse isch us chlynschte Teili gmacht. Die Wahrheit isch unheimlech wichtig für ds Läbe! Oder geits öich nid o so? D Wält schtellt eim ja vor wältsgrossi Ufgabe; Useforderige, wo eim sofort entmuetige. Es isch doch hoffnigslos?! Überall Gwalt u Chrieg. „Da chöi mir zwee doch nüt dran ändere u we mer no wette!“ Halt, sichern! Das isch jetz äbe lötige Chabis, eso z rede! Natürlech chöi mir zwee öppis dran ändere! Alls Grosse fat ja mit eire unschynbar chlyne Tat a. Mir hei dr Jesus ghört, wien är vor nöje Wält verzellt, vom „Reich Gottes“. Da redt är nid vom ene Riese-Blitz u mene Wältsdonnerschlapf, u de isch alls angersch! Nei, dr Prophet Jesaja het scho gseit: „Auf der Erde wird Gerechtigkeit sprossen (45,8)“, u dr Jesus redt vo Same. Das bruucht Zyt. We d im Früelig Same i Härd ströisch, de gseht niemer öppis drvo. Tagelang, wuchelang gseht me nüt drvo. Dr Friede faat a mit Sämlige, wo men am Afang nüt gseht, Sämlige wo unzähligi Stunge bruuche, bis si bchyme, errünne u de äntleche sichtbar Chruut mache.

Kennet dihr dä, wo eine en Usflug gmacht het i Himmel? Dä isch dert zumne Märitstand cho, wo en Ängel grüeft het: „Heissi Liebi, früschi Tröji, feini Grächtigkeit, Friede, Friede!“ Gwunderig isch dä ga luege u het gfragt: „Jä u was choschtet de so heissi Liebi?“ „100 Gramm füfzg Rappe“, het men im gseit. „U de Grächtigkeit?“ „Jedes Gramm ei Rappe präzis,“ hets gheisse. „Dasch aber spottbillig,“ het dä gseit, „isch de das ou ächti Liebi u rächti Grächtigkeit für dä Prys?!“ „Ja sicher“, seit dr Ängel, „aber vrgässet de nid: Mir vrchoufe hie Same!“

Das muess me sech ypräge u nümm vrgässe: Alles Guete fat chlyn a. Öppis ganz Chlyns cha dr Afang sy vo öppis unvorschtellbar viel Grösserem. Das isch würklech es Naturgsetz, es isch nid öppe nume öppis Religiöses. Dr Mathematiker u Meteorolog Edward Lorenz het nach sine Berächnige die berüemti Frag gschtellt: „Chönnt dr Flügelschlag vomne Schmätterling z Brasilie tschuld sy amne Tornado z Texas?“ Unmöglech wärs nid! Aber mier müesse nid uf Texas. Stellet ech numen emal vor, was genau passiert, we mir ä Grippe vertwütsche. E Schwetti Grippevire schwümmt i üsem Bluet desume. Üsi Abwehrpolizei het Alarmstuefe rot, aber si het ke Chance, bis si nid genau usegfunde het, was für ne Viresorte da aagriffe u wo die ihri psungeri Schwachstell het. Irgendwenn - we mir nid grad stärbe a der Grippe - irgendwenn cha denn en einzigi winzigi Abwehr-Zälle eis munzigs Grippe-Virus idäntifiziere. Was isch das scho? Es het Millione, we nid Milliarde vo den Chätzers-Vire im Bluet! Aber die einti schlaui Abwehrzälle git ihri nöji Information jetz wyter a zwo anderi Abwehrzälle, die säges wyter a vier un es geit ke Schtung, de macht d Abwehrpolizeit Milliarde Vire unschädlech, bekämpft die Grippe u mier - hei wieder mal Schwein gha. Also überleget mal: Dä ungloublech Sieg het agfange, wil en einzigi Zälle, wo me nume ungerem Mikroskop cha gseh, ihri Pflicht het ta! Potz Millione!

Das sött me jetz übertrage uf di grosse Problem. Das heisst doch: Du chaisch hüt öppis Würksams mache gäge Chrieg u Ungrächtigkeit uf dr Wält. We du dire Frou hüt e Fröid machsch u se wieder einisch lasch ds lschte Wort la ha, het das vielech bis zletscht Uswürkige bis uf Afghanistan hingere zu de Taliban! We du mit dine Tierleni lieb u aaschtändig umgeisch, het das vilech Uswürkig uf Klima-Erwärmig. We du nid bschyssisch u ehrlech bisch bi de Stüüre… Was macht das scho uus?! Ja, dä chly Bytrag cha irgendwenn das giftige Virus vo Egoismus u Gäldtyrannei überwinde (wo ja erger isch als e Grippevirus).

Du seisch jetz vilech: Da muess me aber cheibe viel Gloube ha! Nei, aber me muess wüsse, wie s Läbe immer u überall funktioniert. Es faht geng chlyn u unschynbar a. Es brucht geng Lüt, wo sech astränge, ihri Schrittli zmache, Lüt wo wüsse, dass us Millione vo chlyne Schritte e grossi Reis wird. Klar, chli Gloube cha sicher nid schade. Aber eigentlech ischs es Wüsse, wie d Wält funktioniert. Dr Jesus verzellt ja kes Wunder, wenn er seit, wie das isch mit em chlyne Sämlig. Eigetlech wüsse mier das ja scho. Aber vilech isch es nöi für di, dass alles so funktoniert, alles, wo muess besser wärde uf dr Wält.

Es brucht unschynbari Fründlechkeite; es brucht chlyni Liebesdienschte. Me mues mache, was sech ghört, o wes niemer gseht. Me muess enang vergä, o we me alle Grund hätt, uf e Tisch zhaue. Mängisch muess me aschtändig z Bode schtelle, statt geng zu allem z schwyge. Das sy Sämlige vom Rych vo Gott, Sämlige vo dere nöje Wält, wo dr Jesus drvo redt.

Dadrzue no e letschte Gedanke. D Wüsseschaft plagiert ja, i jedem chlyne Sämlig syg alli Informatione gspycheret, wo die Pflanze bruucht zum Wachse. Ja, scho sicher, isch da alli Information drin, aber si mer ehrlech: Information alei längt doch bi wytem nid. Information? I mim Computer isch o vil Information gspycheret; vilech no meh als imne Sämlig. Aber dä Computer chöit dr jitz bschütte, so viel dr weit, da wachst gar nüt. Dä macht nie chlyni Compüterli, wo me de mal chönnti ärne. Nei gället, mit däne gspycherete Informatione tüe mer chly bluffe. Öppis muess ja de no da sy, wo jedi Information tuet abrüefe u zum Läbe bringe. Ds Läbe isch ds Wäsentleche. Dadrvo aber wüsse mir zäges nüt. Sone Sämlig cha niemer konstruiere, dä chame sech nume la gä. Dr Sämlig isch es läbigs Gschöpf vo Gott.

Un i gloube, dass o di chlyne guete Tate ähnlech läbigi Wunder sy. We zum Byschpil öpper es volls Portemonnaie, won er gfunge het, uf ds Fundbüro bringt, isch das doch es Wunder, weme däicht, was für egoistischi Tröpf mir normalerwys sy! So Wunder wachse, spriesse, blüeje u trage Frucht. Es söll niemer säge, ä chlyni Geste vor Liebe syg doch „numen e Tropfe ufne heisse Stei“. Dä vom Tropfen ufne heisse Stei isch im Rych vo Gott schlicht u eifach e tumme Spruch. La di nid la entmuetige vo de grosse Useforderige. Mach dini chlyne Schritt. D Wahrheit u ds Guete sy Sämlig, wo ufgöh u gross wärde, me weiss nid wie.

„Die Erde tue sich auf und bringe das Heil hervor, sie lasse Gerechtigkeit sprießen. Ich, der Höchste, will es vollbringen, spricht Er, der Barmherzige.“ Amen.

Schön, dass Dihr zueglost heit. Für ds nöije Jahr wünschen i euch Glück, das bruche mer ja o, Glück i Stall u Stube. Bhüetech Gott!

Einen Kommentar schreiben

*
*
Bitte rechnen Sie 5 plus 6.
*